حكاياتي ما بين نصري وسقطاتي (علي صريح)

لن تستغرب ان قال السيد محمد طنطاوي شيخ الازهر (من زمان اوي) ان الريس بيتعبد وبياخد حسنات كمان وهو نايم ؟
لانه فعلا ساعتها هيطبق المثل المعروف نوم الريس عباده


لماذا ذاد سعر الحديد في مصر ؟؟
لان الحديد المصري غير اي حديد في الدنيا كفايه انه متربي في العز

اعلان مصانع الحديد بتاعت رجل الاعمال الشريف احمد عز بيقول هنا في المكان ده كلنا اخوات واهل في بعضنا وبقالنا كام مليون سنه؟
علي اساس ان الفراعنه كانوا بيستخدموا حديد عزنتحتب السادس في بناء الاهرمات

هل تفضل النوم علي الحديده ام علي ريش النعام؟؟؟
الاجابه بلا شك ستكون ريش النعام
ولكن بعدما تعلم ان طن الحديد ب8000 جنيه هترمي كل المخدات وهتجيب مكانها اسياخ حديد عز

ماذا سيحدث ان صحوت من نومي علي خبر استقاله الريس وبدا انتخابات نظيفه؟؟؟؟
هضرب نفسي قلمين وارجع انام تاني علشان اكمل الحلم الجميل ده(عند امه يا ادهم)

لو قادر تجيني تعالي مش قادر تجيني مسامحك اوعي واحنا ما بنا فراق احس ان الشوق جارحك(من الريس لشارون)


قالوا مره ان الريس زعلان طيب ليه ياريس؟؟؟
رد الريس وقال انه مش عارف يقعد علي قهوه زي اي مواطن
ولا تعليق (شيشيه يا طوخي)

هناك رجل سوداني شاهدته في البيت بيتك للاسف نسيت اسمه اسس جائزه الحكم الصالح او الملك الصالح امتي هيديها لمبارك؟؟؟؟؟؟
لما يبحث عن الصالح في قاموس الحزب الوطني المعدل اللي فيه
العداله + الحق +انخفاض الاسعار +الخير +المسؤليه=اول سله زباله تقابلك يا كبير
واللي فيه الصلاح =مواطن تعبان زهقان متضايق (0ده يعادل ريكو في قاموس ميلودي)


مصر تغني للرئيس هكذا يقولون في طرقات امانه الحزب الوطني ولكنهم نسوا ان يقولوا ان الاغنيه
جبااااااااااااااااااااااار

وفي القصر الرئاسي قالوا ان الريس بيغني لمصر وبردو نسيوا يقولوا ان هو بيغني
اعتذري للي هيجي بعدي خليه يسامحني اصلي انا اخدت كل حاجه في عهدي وشوفي عهدي كان كام سنه


انا اتمني ان الريس يتدخل في حل مشكله عبد ربه لانه وبكل ثقه هيصدر فرمان انه من حق فريق هبوعيل تل ابيب
ما هو ده اللي ناقص

دي بقي اسئله اتسئلتها وزي ما وعدت اللي سالوني هجاوب عليها هنا

يعني الريس مش عاجبك فيه حاجه؟
بجد وبصراحه الريس عليه نضاره من علي كوبري طلخا بخسمه جنيه ملهاش حل
وبدله من البيت الايطالي من ام 299 جنيه اللي عليها كرافات وشراب هديه تمام
ويا عيني علي كوتش السكه الجديده حكايه لوحده بينور في المباحثات الليليه


السؤال اللي بعده انت مش خايف؟؟؟؟؟؟
واخاف ليه مادام الرب واحد والعمر واحد وبقالنا خمسه وعشرين سنه لينا رئيس واحد



الي اي تيار سياسي تنتمي؟ مين اللي بيوزك؟
عليا النعمه انا تبع نفسي مشهيص نفسي ومرسي نفسي علي الحوار لوحدي
ولا اي حد بيوزني ولو قصدك علي الاخوان انا بشرب حشيش(مبالغه)

واخيرا هذا هو الموقف الذي جعلني لا اخشي شيئا وان اكتب واكتب بعدما جعلني ابكي وابكي وابكي
كنت مارا في شارع من الشوارع ورايت رجل عجوز يتكأ علي عصاه ويحاول ان يعبر الشارع ولكن تردده وتردد العربه الماره امامه جعلت الحادثه شئ مؤكد
ولكن نجي الرجل بحمد الله ولكن العصا في يده وقعت اسفل العربه وكسرت
اسرعنا الي الرجل نحاول ان نحمله من علي الارض ونطمأن عليه
وبعدما انفض الناس من حوله وبقيت انا وزميلاي بكي الرجل بشده حتي انتحب فما لبست ان دمعت عيناي وعيونهم امام هذا الضعيف
واخذت اواسيه بان يحمد الله علي سلامته
ولكن الرجل نظر لي بقوه وقال العصا احاول من ست شهور ان اشتريها ولكن المعاش لا يكفي لشراء العصا وما ان اشتريتها وخرجت اليوم حتي دهستها العربه
ثم انتحب بشده
لم اتمالك نفسي وبكيت كثيرا بجواره حتي ان زميلاي استغربا من ذلك ولكنهم معذوران فهم لم يروا نظرات الرجل المكسور الحزين علي عصا لا يتعدي ثمنها الثلاثون جنيها مصريا
تركت الرجل بعد فتره واحسست بكره وغضب يتملكني حتي انني لم اكمل مع اصدقائي وعدت الي البيت حزينا
ولكي أخرج من حزني اخزت اكتب واستهزء واسخر من هؤلاء القوم الذين استعبدوا شعبا اعزهم الله بالاسلام والعقل
كتبت كي اهزم سجن الصمت الرهيب الذي طالما امتكلني
كي اعبر اسوار الخوف من الظلم والظالمين
كي اكسر قيود المستبدين حول معاصم االمؤمنين